أخبار ساخنة

((سهرات الشتي))



هـا السنة كانت محرزة التلجة
وصاروا غصون الورد بردانين
بلحاف التّلج... تغطّت المرجة
وتكتكتوا من بردهم لـِ حساسين
///////////////////////////////////////////

موسمك صار... يا "القاطرجي"
والنّاس حول النّار ملمومين
بيّ وأمّ... والحجّ والحجّة
وولاد بِدَفا اللمّة فرحانين
عجقة محبة... وكركرة... وضجّة
رغم العواصف... القلوب دفيانين
كستنا... وزبيب.... ومجّة ورا مجّة
زعتر وزوفا طْرابين مغليّين
وستّي حضّرت ع الظهر عجّي
وأنجأ لقمتين للعشا بقيانين
///////////////////////////////////////////

بحبّ سهراتنا... وحاضرة الحِجِّة
إلفة وبساطة... وجيران ومحبّين
فرجة الشّتي ببلادنا فرجة
حكايات السِّحر للعمر محكييّن
ياما وحولو مرمغت وجّي
وياما عيونو رِوِتْ عطشانين
///////////////////////////////////////////

ريفنا ثروة... وكنوز بالقجّة
لازم نزيدها... ونكون حرصانين
يمشوا ولادنا ع نهجك ونهجي
ويتخلّد بوجدانهم... عمر وسنين
///////////////////////////////////////////